आवाज हुंदक्यांचा, ओठात दाबलेला !

चिता आणि चिंता
चिता आणि चिंता या दोन शब्दांमध्ये केवळ एका अनुस्वाराच फरक आहे
परंतु या दोहोमध्ये जर श्रेष्ठ कोण असेल तर चिंता होय .
कारण चिता हि निर्जीव देहाला जाळते तर चिंता हि सजीवाला जाळते
म्हणूनच चिंतेचा सर्वथा त्याग करावा



आवाज हुंदक्यांचा, ओठात दाबलेला !
ओथंब आठवांचा डोळ्यात दाटलेला !!

छळते किती-कितीदा ही रात्र पावसाळी..
रंध्रात विरघळावा मृदगंध साठलेला !!

बघ आवरु कसा हा आवेग स्पंदनांचा...
होता सुगंध श्वासा- श्वासात माळलेला !!

तो तीळ जीवघेणा खांदयावरी सख्याच्या...
मग चंद्र पौर्णिमेचा फ़िकाच वाटलेला !!

भाळावरी सख्याच्या सजतात घर्मबिंदू...
पडता मिठी खुलावा शृंगार राखलेला !!

गालांवरी उमटली होती पहाट लाली
प्राजक्त देठ तेव्हा भाळून लाजलेला !!

कल्लोळ भावनांचा जाणेल रातराणी
भावार्थ मौनतेचा ओठात आटलेला !!